02/12/15

Matilda


O pasado luns 30 de novembro reunímonos na biblioteca cun grupo bastante numeroso de alumnos de 1º da ESO para falar da novela de Roal Dahl:  MATILDA.


Esta obra conta a vida da protagonista, Matilda, que dende moi pequeña decátase de que non ten nada en común con ningún membro da súa familia. Os seus pais non lle dedican ningunha atención e ela pasa as horas do día lendo libros. Un día descubre que ten poderes e decide utilizalos para axudar á única persoa que lle demostrou afecto: a súa profesora.




En xeral foi unha novela que todos os rapaces atoparon divertida malia que algúns deles destacaron que o final foi un pouco triste. Todos os nenos participaron achegando os seus diferentes puntos de vista e comentando as partes da obra que máis lle gustaran. Como se daba a casualidade de que moitos deles tamén viran a película baseada nesta obra, aproveitamos para comentar as similitudes e diferencias entre o libro e a película. 

20/11/15

Palabras de caramelo

 O luns, 10 de outubro, reunímonos por primeira vez cos novos membros do club de lectura de 1º de ESO. O libro escollido é un libro sinxelo que non chega ás cen páxinas, pero con moita historia que contar.
Palabras de caramelo, de Gonzalo Moure, fala dun neno saharaui xordomudo que, a través da conversa co seu camelo, chega a facer uns marabillosos poemas. Pero tamén fala da amizade, da morte e, desde logo, da situación dos refuxiados saharauis na  hamada, onde se ven obrigados a vivir. De todo iso e moito mais conversamos cos novos lectores e lectoras do club deste ano, aos que lles encantou o libro.
Un dos episodios conta como a mestra da escola do campo de refuxiados apréndella a ler e escribir ao protagonista, que así empeza a comunicar con palabras todo o que sente e todo o que fala con Caramelo. Como este tema deunos moito para reflexionar, puxemos uns fragmentos da película El milagro de Ana Sullivan, baseado nunha historia real,  que conta como no século XIX, a mestra Sulivan conseguiu aprender a falar, ler e escribir a unha  nena cega e xorda, e o cambio que supuxo para ela o dominio da linguaxe.
Como sempre, a hora non deu de si todo o que quixéramos. Iso si: todos demos boa conta do pastel e biscoito que trouxemos para acompañar a sesión.

18/11/15

En la vida real

O departamento de Tecnoloxía do IES colaborou coa Biblioteca propoñendo ao clube de lectura o cómic EN LA VIDA REAL (Roca editorial).

A recepción da obra foi moi positiva, tendo que destacar de entrada que é a primeira vez que se escolle un cómic para o clube de lectura. Este foi o primeiro tema debatido na reunión do clube: que os cómics (e tamén cada vez máis os videoxogos) poden e deben considerarse "literatura" pois serven para o mesmo que os libros (crear mundos de ficción que lle dan sentido ao noso), usando outros medios artísticos (narración visual no caso do cómic). E como tal é unha mágoa que moitas escolas e bibliotecas non os estean a utilizar como recomendacións de lectura.

O resto da reunión foi unha análise breve dalgúns temas tratados na obra: adolescencia, videoxogos, realidade virtual versus realidade física, diferencias culturais e sociais...

Ao profesor chamoulle a atención que moitos dos compoñentes do clube, xogadores habituais, descoñecesen que é completamente real un dos temas centrais da obra: a subcontratación de videoxogadores "pobres" por parte de xogadores "ricos" para aumentar o seu nivel nun xogo. Podedes ler ao respecto neste artigo.

Por último solicitouse aos compoñentes do clube que recomendaran algúns videoxogos pola súas características narrativas innovadoras, ou algún cómic relacionado cos videoxogos. Estes foron algúns deles:
      • LIMBO
      • LIFE IS STRANGE
      • BEYOND TWO SOULS
      • RADIANT HISTORIA
      • LOG HORIZON
      • MONUMENT VALLEY
      • DARK ORBIT
      • SUICIDE ROOM (película)

21/10/15

Club manga

O martes 6 de outubro tivemos a 1ª reunión do noso club de manga OTAKU ANIKI a que asistiu tod@ o alumnado interesado nesta arte e que quere participar nas actividades ao longo do novo curso. Coma no curso pasado a asistencia foi moi numerosa  con alumn@s que repiten e novas incorporacións.  

Esta xuntanza estivo dirixida pola coordinadora do club que explicou as distintas actividades que imos a desenrolar:
  • Sesións na hora de leer (3ª e 6ª) onde veremos un ANIME no salón de actos a proposta d@n
    membr@o do club cunha pequena explicación pola súa parte sobre o tema e o tipo de anime que nos quere presentar. Logo haberá un pequeno debate sobre o que vimos. A primeira en presentarnos un anime é  antía Fernández de 1º ESO C
  • Intertar de novo traer a debuxantes para dar unha clase práctica sobre as técnicas para debuxar manga. Esta actividade está pendente de financiación e se desenrolaría un luns ao mediodía.
  • Traballar con MANGAS EN BRANCO, viñetas sen texto e texto sen debuxo. Facer unha expo desta actividade.
  • Crear un espazo web no blog da biblio para novas e actividades.
  • Participar xunto cos clubes de manga do IES ALVARO CUNQUEIRO e do IES Paralaia de Moaña en unhas xornadas arredor deste arte, con actividades que aínda temos que consensuar para compartir as nosas iniciativas e inquedanzas.
Rematamos a reunión ata a vindeira 3ª hora de leer onde compartiremos a nosa pasión!!!

17/06/15

El diario secreto de Adrian Mole

O luns día 8 de xuño tivemos a derradeira sesión do Club de Lectura co  Diario Secreto de Adrian Mole de Sue Townsend. Como adoita pasar nesta derradeira sesión, a asistencia foi menor que nas anteriores, dezasete  rapaces e rapazas, pero con moito entusiasmo por falar e compartir ideas e impresións.
Logo de compartir bocatas, froitas, biscoito e bombóns, puxémonos a falar do libro. En xeral, o libro gustou, coa excepción de dúas persoas que expresaron unha opinión negativa. Nalgún caso foi o feito de ser un diario o que non gustou, mentres que en varios foi iso precisamente o que resultou máis interesante.
Comezamos establecendo diferenzas entre a situación (Inglaterra dos anos 80 e a Galicia actual), pero como pronto puidemos apreciar son máis as analoxías que as diferenzas, malia a falta de elementos que hoxe non deixarían de estar presentes (todos os novos medios de comunicación, móbiles, correos electrónicos, etc). De aí pasamos a comentar temas concretos relacionados co libro (a situación na que se atopa Adrian, no medio do divorcio dos pais) e moitos outros que xurdiron a raíz de comentarios: o acoso escolar, o paso a adolescencia, a necesidade de privacidade, os problemas xeracionais cos pais, o machismo...
Para rematar, vimos os dez primeiros minutos do primeiro episodio da serie da televisión inglesa baseada neste libro, nos que aparecen practicamente todos os protagonistas. Antes, fixemos unha actividade: fixeron unha descrición física (algúns fixeron debuxos) de como imaxinaban aos personaxes.


A sesión resultou moi dinámica a pesares de ser a derradeira. 

04/06/15

Ruta literaria Rianxo e Corrubedo

O venres 29 de maio fomos cos mozos e mozas dos clubs de lectura a Rianxo. Como o proxecto interdisciplinar do centro trata sobre as augas e o mar en Galicia, eliximos Rianxo como destino adecuado. Visitamos o Museo do Mar, onde coñecemos distintas artes de pesca, perfectamente ilustradas con maquetas, así como interesantes aspectos da vida do mar e a economía dun pobo baseada na pesca.  Aquí fixemos unha primeira lectura do poeta Ramón Cabanillas.
Visitamos logo a casa-museo de Manuel Antonio. Coa axuda da guía coñecemos importantes episodios da súa vida, o seu desexo de ser mariño, a súa implicación en dignificar a lingua galega, a súa enfermidade. O museo está ilustrado con fotos da época realizadas por un amigo de Manuel Antonio coñecido como Pepito Pérez que serven para coñecer episodios da emigración, dos costumes e vestimenta da época e dos intelectuais da época empeñados en manter e recuperar a lingua galega. Antes de marchar fixemos a lectura do poema Sós.
Xa fóra, e na mesma rúa, visitamos as casas onde viviron Castelao e Rafael Dieste, aquí lemos o conto “Nova York é noso” do seu libro Dos arquivos do trasno. Tres escritores que coincidiron no mesmo espazo e no mesmo tempo e aos que a vila de Rianxo mantén vivos no seu recordo.                  
Para comer marchamos á praia de Cabío, onde desfrutamos dun fermoso día de convivencia e lecer. Alí, como non, lemos o conto de Castelao O pai de Migueliño. Aproveitamos tamén para sacar algunhas fotos para presentar ao noso concurso fotográfico “Ler ao carón das augas”. Antes de voltar para Vigo aínda visitamos Corrubedo e  as súas fermosas Dunas.     

22/05/15

Mío, mi pequeño Mío

O luns 18 de maio fixemos a reunión do club de lectura de 1ºESO. Asistiron uns vinte alumnos aproximadamente. O inicio da novela pareceulle aburrido a algún, pero en xeral gustoulle a todos. O mais sorprendente para min foi que, sendo alumnos de 1ºEso foron capaces de recoñecer e mencionar as referencias literarias que hay na novela , por exemplo: a mazá de Brancaneves e como aquí adquire un papel
positivo; o xenio da botella (como  a lámpada de Aladino); referencias  que aparecen en Harry Potter (a capa que o fai invisible e que está tecida de soños que xa viña do Cantar dos Nibelungos), o amor a natureza ,o respeto polos recursos básicos que compartimos todos: o pan e a auga,. Finalmente o papel da frauta  (recordaron o frautista de Hammelin) que da pracer os sentidos e ainda mais, axuda o protagonista a atopar o amigo cando se perde.

21/05/15

O corazón de Xúpiter

O pasado luns 18 fixemos sesión do club de lectura do libro  de Ledicia Costas O corazón de Xúpiter.
Comezamos falando da impresión xeral do libro: gustou moito, aínda que houbo quen se queixou do final...eles prefiren que as historias rematen ben.
Pasamos a reflexionar sobre os temas, porque o libro ademáis do acoso
cibernético trata da amizade, do amor, das relacións coa familia ou da dificultade para atopar un oco nun novo lugar, nun novo instituto. Compartimos experiencias e algúns contaron que sufriran un traslado, como Isla, e non é doado na adolescencia cambiar de entorno.
Despois repasamos os proagonistas, a elección do seu nome non parece gratuíta: a illada Isla, a forte Mar, a xenerosidade de Anxo ou o gaseoso Xúpiter, carente de interior definido (ese "corazón de Xúpiter" do título). Tamén pensamos na simboloxía das medusas, bágoas do mar.
Vimos o video de Amanda Todd, e comentamos que, o que nos conta, está máis presente nas súas vidas do que parece;  sen chegar ao suicidio, varios sabían de casos semellantes.
Para finalizar, aínda quedou tempo para buscar a xúpiter e a estela polar no mapa do ceo.

08/05/15

Club manga

O pasado luns 27 de abril reunímonos o club de manga OTAKU ANIKI ás 14.15 horas na biblioteca para levar a cabo o 1º obradoiro de debuxo de Manga. Contamos coa presencia de Norberto Fernández Serrano, debuxante de comics e manga con unha dilatada traxectoria en numerosas publicacións de España (Ed. Xerais. Golfiño…) e USA (Marvel comics, Image…).

Os  asistentes, todos de 1º da ESO pois tivemos que dividir o grupo para que a actividade fora o máis aproveitable posible, estiveron moi atentos ás explicacións de Norberto que dun xeito práctico, foi debuxando diversos personaxes e actitudes para iniciarse no debuxo dos mangas.

Pouco a pouco na pizarra debuxados por Norberto foron aparecendo personaxes femininos e masculinos acompañados de armas e accesorios cheos de fantasía, pois o manga é un xénero aberto á imaxinación e á creatividade. Os rapaces e rapazas, á vez que seguían as explicacións, debuxaban as súas propias creacións. Rematamos os últimos minutos co traballo individual onde cada un foi perfeccionando os esbozos que crearan ao longo do obradoiro.


Cando tocou o timbre para iniciar as clases da tarde, Norberto agradeceu o interés e bo comportamento dos asistentes e eles agradeceron o seu traballo cun forte aplauso e unha longa “cola” para que Norberto firmase o seu primeiro debuxo manga neste club.






29/04/15


ARTHUR CONAN DOYLE E AGATHA CHRISTIE

O pasado luns, 7 de abril, reunímonos de novo os participantes do club de lectura para 1º de ESO  para falar das obras dos grandes maestros e precursores  da novela policiaca que lemos esta vez: os autores foron Arthur Conan Doyle, do que se leron diferentes novelas e relatos de  Sherlock Holmes; e Agatha Christie, da que tamén leron algunhas novelas.


En primeiro lugar, cada un de nos falou da novela ou relatos que lera, resumíndoos e falando do que máis lle gustara. Despois falamos tamén do misterio, de cómo estes grandes detectives resólveno interpretando diferentes indicios dun modo tan perspicaz e con tan poucos medios como contaban na época, por exemplo, de Holmes, tan diferente do que aparece nas series e novelas policiacas actuais. E, por suposto, tamén falamos dos asasinatos e os criminais que pululan por estas obras, así como por outras actuais do xénero, lidas polos alumnos e alumnas.


E, como non, tampouco esta vez faltou o biscoito para endulzar a conversa e completar o almorzo. Como sempre, unha agradable reunión de lector@s. Mágoa que esquecéramos sacar algunha foto.

24/04/15

Mío, mi pequeño mío.

Ao comenzo da xuntanza á maioría dos participante pareceulles un libro para nenos pequenos, pero a medida que foron aportando impresións e fomos analizando o libro empezou a cambiar a percepción da novela.
Algúns viron paralelismos con Harry Potter, pois o neno vive cunha familia de acollida e non se sinte querido, quizais J.K.  Rowling se inspirou en Astrid Lindgen. Outros descubriron na novela símbolos de os contos tradicionais: a mazá, o xenio nunha botella de cervexa, a viaxe, a capa invisible, recordo da capa de Sigfrido -a autora é sueca...similitudes co frautista de Hamelin, pero en positivo, pois a frauta salvounos.

Por riba de todo gustoulles as expresións tan sinxelas e bonitas como "o pan sacia a fame, a auga que calma a sede..."
Por outra parte, este libro desprende amor pola natureza que nos coida: a árbore, case seca, que protexe aos nenos, o sacrificio dos paxaros para axudalos.



25/02/15

Francisco Castro cos clubs de lectura

O luns 9 de febreiro, mozos e mozas dos clubs de lectura recibiron a visita do escritor Francisco Castro. Foi una sesión conxunta de posta en común co autor, xa que tiñan lidas tres obras del: Chamádeme Simbad, O neno can, e O Corazón da Branca de Neve.

 Falou Francisco da importancia da lectura como motor de cambio, de que se fixo escritor para cambiar o mundo e do afortunado que se sinte de facer o que máis lle gusta na vida. Nas súas obras sempre hai reflectido algún aspecto social de relevancia e sobre o que necesitamos reflexionar.

 Dinos que escribiu Chamádeme Simbad para contarlle ao seu fillo que a avoa empezaba a ter alzheimer, pero sen dramatismos e dun xeito divertido para que calquera poida comprendelo. E a súa charla transcorría tamén nese ambiente distendido e divertido mentres tocaba temas de fondo calado. Comentounos tamén a experiencia de escribir O neno can a dúas mans con Fina Casalderrey, e o esixente que foi a experiencia e do que supuxo para eles tratar de mostrar a situación precaria da infancia en lugares aos que non lles prestamos atención.

En O Corazón da Branca de Neve fálanos do drama que supón o roubo dun fillo, pero tamén se deixan ver outras perdas que quedan máis ocultas por culpa dos clixés sociais, como é o caso da anorexia. Francisco recórdalles sobre todo ás nenas que non se deixen presionar pola cultura do corpo perfecto.

 Na quenda de preguntas, tivo a ben explicar o, segundo o alumnado, precipitado final de O Corazón da Branca de Neve. Explicounos que, sendo una novela por entregas, a súa construción tiña que cumprir uns requisitos: 31 capítulos que non podían pasar dos 3550 carácteres para seren publicados a razón de un capítulo por día. A parte da importante labor de lima, non se podía deixar perder o interese ata o final. Tamén houbo preguntas sobre o título da obra, e a resposta saíu do propio auditorio.

Os rapaces e rapazas que asistiron consideran que é moi simpático e interesante, e que lles fixo pensar ao tempo que lles fixo rir. Ao final, una restra de libros para firmar, algúns xa incluso coa última obra do autor, Tes ata as dez, da que seguramente terá que vir a falarnos no próximo curso.
 E non faltaron as fotos con el, que o propio autor subiu ao seu facebook.


04/02/15

Eidolon e Dragal

O luns 12 de xaneiro falamos de Eidolon e Dragal.

Animais que falan, dragóns, trolls, elfos, unicornios, ninfas... son todos personaxes dun mundo fantástico onde os nosos lectores do Club de lectura de 1ºESO se desenvolven con total seguridade.

As aventuras de Ben e Hadrián gustaron moito e algúns animáronse a levar as segundas partes.


29/01/15

O xogo de Ender

En Febreiro reuniúse o clube de lectura para debater sobre O XOGO DE ENDER, clásico libro de CF recomendado polo departamento de Tecnoloxía, dispoñible en galego e castelán na biblioteca.

 Un dos temas que máis puido sorprender aos do clube foi saber que este libro é un long seller: leva vendidos moitos millóns de exemplares dende fai 30 anos e os seus fans son moi activos na súa recomendación e difusión. Que moitos lectores e lectoras de outras exitosas obras de CF actuais (LOS JUEGOS DEL HAMBRE, DIVERGENTE...) non o coñezan pode achacarse a que non son conscientes de estar a ler o xénero de CF (eles falan de distopía, subxénero tradicional na CF; e nas librerías esas novelas non se venden coa etiqueta de CF) e tamén a que o profesorado e as bibliotecas non fan moita difusión dun xénero que pretende servir de punto de encontro entre as 2 culturas.

Respecto da temática do libro podemos apuntar algúns dos principais:

  • a (mala) comunicación coma orixe dos problemas bélicos e políticos.
  • a importancia das redes de comunicación (nunha novela escrita moito antes da Internet actual!).
  • o uso dos xogos e dos videoxogos na formación intelectual, en especial para desenvolver o pensamento lateral, a resolución de problemas, as estratexias e xestión de recursos...
  • a confrontación da ética individual coas normas sociais (debemos acatar sempre as ordes dos gobernantes?).
  • a tecnoloxía da comunicación e colonización espacial (cando non podemos viaxar a velocidades superlumínicas).
  • e outros máis nunha das novelas que máis xente relé...
 Neste caso non é unha frase feita dicir que quen pasa das primeiras páxinas queda atrapado por unha trama absorbente, pero unha lectura que continúa cando rematas a novela polo interese dos temas prantexados. E é bo avisar que a película que se fixo fai pouco é bastante frouxa, non captura o interese do libro.

Tamén é interesante apuntar que a súa continuación, LA VOZ DE LOS MUERTOS (sen edición galega polo momento; tedes a edición en castelán na biblio) é igual de recomendable, pois non é unha copia ampliada da 1ª parte, ten entidade propia, con unha trama máis centrada na xenética.


Decir tamén que neste debate, para darlle un toque tecnolóxico, fixemos unha proba de utilizar o twitter simultaneamente. Aquí tedes o resultado (usamos o hashtag #biblioboveda).