16/06/16

Calvin y Hobbes


Esta semana tivo lugar a derradeira sesión do club de lectura. Nesta ocasión charlamos sobre Calvin y Hobbes. Pensamos que a estas alturas de curso era mellor unha lectura "lixeiriña" e que nos levara a esquecer o costoso da recta final por iso, aconsellados por Dani, o noso profe de cabeceira, no que a cómic se refire, mergullamos nas tiras de   Bill Watterson, un grande do xénero.

Foi, precisamente, Dani o encargado de abrir a charla cunha pequena semblanza do autor. Destacou como, despois de dez anos publicando as súas tiras diariamente, cando estaba na cima do éxito, decidiu deixalo para, como él mesmo indica na carta de despedida "traballar a un ritmo máis meditativo". Dani salientou a integridade deste creador que dende sempre renunciou a que os seus persoaxe saíran das tiras para seren utilizados en merchandising.


Despois de compartir impresións xerais sobre a obra,  pasamos a reflexionar sobre as personalidades de  Calvin, Hobbes, a nai, o pai, Susie, o matón Moe, a profe Carcoma ou mesmo o Capitán Spiff, ese alter ego aventureiro de Calvin. Falamos de intertextualidade presente na obra , dos superheroes, do cine de suspense e aventuras e mesmo da literatura que hai detrás deste cómic. Proxectamos varias tiras para analizar a imaxe, o encadre das viñetas que desaparece cando o autor precisa que todo flúa, a distibución do espazo, a cor, o texto...

E comprobamos que baixo a apariencia de lectura "lixeira", late unha profunda reflexión sobre a política, os costumes, a sociedade, a familia, a vida.

Todo, por suposto moi ben aderezado con suculentos e exquisitos doces, elaborados non só polos profes, pois temos entre o alumnado lector estupendos reposteiros.


O vindeiro curso... CONTINUARÁ



01/06/16

Visita a Monforte da man de Manuel María

O venres 27 de maio fomos cos mozos e mozas dos clubs de lectura a Monforte de Lemos. O concello achegounos unha ruta e un acompañante que nos levou por distintos puntos da vila seguindo o Cancioneiro de Moforte de Manuel María, escritor que viviu a meirande parte da súa vida nesta vila lucense. Cada alumno ía provisto dos poemas e un plano de Monforte para situarnos no percorrido.
Comezamos a visita guiada no Campo da Compañía e o Mosteiro dos Escolapios. Neste espazo fixemos visita á capela e a escaleira do colexio, onde fixemos as primeiras lecturas: Eu nacín en outono e Cancionciña en lembranza da festa das reliquias. Seguimos achegándonos ao tranquilo río Cabe, onde lemos Poemiña do río Cabe. Pasamos agora pola Ponte Vella e chegamos ao Convento de Santa Clara, aquí lemos a Canción da Ponte Vella e Convento de Santa Clara. Despois visitamos, sempre atentos ás explicacións do guía, o centro de interpretación do viño da Ribeira Sacra, antigo concello onde realizou o seu traballo Manuel María como procurador. Neste precioso espazo realizamos a lectura da Canción da Vendima.
A continuación marchamos cara á Praza de España e lemos o poema adicado a Inés de Castro, logo de escoitar a súa apaixonante historia. Subimos despois polas estreitas rúas do Monforte Medieval, pasando pola xudería, visitando as dúas portas que aínda quedan en pé da antiga muralla. Chegamos ao Monte de San Vicente, onde está o Pazo, o Mosteiro e a Torre. Lemos aquí o poema Monte de San Vicente do Pino, ao tempo que desfrutamos dunha marabillosa vista de Monforte. Baixamos novamente cara ao centro, paseamos pola rúa do Cardenal e rematamos no busto que a vila ten adicado ao escritor. Aquí lemos Canción da rúa do cardenal e Carné de identidade.

Pola tarde aproveitamos a viaxe de volta para visitar o convento cisterciense das Bernardas en Ferreira de Pantón. Aquí fixemos entrega dun agasallo a Pedro Mirón, alumno do instituto que remata este ano 2º de bacharelato e que foi un colaborador e fiel participante no Club de Lectura durante a súa estadía no noso centro. Completamos a viaxe cun paseo polo casco de Ribadavia. Un día completo e moi ben aproveitado.




12/05/16

O pazo baleiro


O pasado luns, 9 de maio, tivemos na biblioteca a derradeira reunión do curso co clube de lectura de 1º de ESO.

O libro que nos reuniu esta vez foi O pazo baleiro de Xabier P. Docampo, unha  novela de misterio apaixoante, cun vello pazo cheo de segredos agochados, propiedade dunha familia cunha peculiar árbore xenealóxica. E tamén haberá de por medio un  diamante de incribles dimensións que  os enfrontara  a todos dende hai moito tempo.

Será un grupo de adolescentes, axudados por Delio, tío do protagonista , quen desfaga toda esta maraña descubrindo a historia da familia e o misterio que encerra este pazo baleiro. Unha novela chea de intriga e temas para comentar.

Como sempre, a reunión cos nosos “lectores” estivo acompañada con algunha que outra larpeirada.

Ata o curso que ven!

11/05/16

Memorias dun neno labrego

O pasado 20 de abril latamos clase o grupiño do club de lectura para achegarnos ao museo etnográfico da fundación Liste, na rúa da Pastora. Alí fixemos a sesión correspondente ao libro de Xosé Neira Vilas, que é de certo un dos clásicos da nosa literatura.


 Primeiro realizamos unha visita adaptada ás historias do Balbino, que

preparou cunha dedicación que é de agradecer o persoal deste museo. Repasamos os oficios, os apeiros e obxectos da vida cotián e ritual empregados até fai ben pouco nas aldeas galegas. 



 Despois saímos ao ar libre para comentar como fora a lectura dun relato á vez tan próximo e distante para o alumnado dun instituto urbán como o noso.


Recordamos algunha pasaxe do libro, como a da morte 
de Pachín, o querido can de Balbino, unha de tantas experiencias relacionadas coa perda -da nenez, da vida, da inocencia, das raíces- que narra Neira Vilas. Tamén houbo quen se lembrou da orixe familiar, que á fin se rascamos un pouco, todas e todos temos algo de terra pola parte do pasado. 

 Ao rematar, tras un percance que debeu ser cousa dalgún tardo ou trasno dos que andan polo lugar e que temos a ben gardar no peto, volvimos para o centro a fume de carozo, que o barrio ás veces, cando se anda con apuro, parece facerse máis grande do que semella!

02/03/16

La soledad de los números primos

O luns 29 de febreiro de 2016 ás 14:30 horas, no espazo entre as clases da mañán e da tarde, fixemos unha sesión do club de lectura, nos espazos da biblioteca do noso instituto,  para falar sobre o libro proposto La soledad de los números primos. Despois de dar conta dun merecido e saboroso xantar, puxémonos a falar sobre o libro. Á maioría dos asistentes gustoulles, aínda que houbo alguén a quen lle pareceu unha historia un pouco dura, e non foi capaz de rematalo.

Falamos sobre os protagonistas Mattia e Alice, sobre as súas experiencias e problemas, chegando incluso a comparar a gravidade de ambas, do posible papel que as súas nais e pais xogaron  nas mesmas, analizamos o por que do titulo, saíndo distintas opinións 
sobre o sentido ou non do mesmo, e a súa relación coas matemáticas, analizamos o papel doutros personaxes (con máis ou menos profundidade). Demos tamén a nosa opinión sobre se nos gustou ou non o final do libro, habendo tamén discrepancias.

18/02/16

La vuelta al mundo de un forro polar rojo



O alumnado do Club de Lectura tamén participou dentro de Proxecto Interdisciplinar levado a cabo polo profesorado das distintas materias en 3º da ESO. Un grupo deles encargouse de debuxar o mapamundi que serviría para colocar as etiquetas da roupa segundo o lugar da súa  manufactura. Asemade, os alumnos do club encargáronse de recordar aos seus compañeiros de traer as etiquetas das súas casas para seren colocadas no mapa.
Na sesión de lectura, repasamos os diferentes capítulos recordando a viaxe do forro polar vermello, incidindo na problemática económica ou social que se reflexaba en cada un deles. Para o alumnado máis pequeño resultou unha lectura algo densa e confesaron que o leron moi por enriba; non así os maiores, que demostraron moita madurez á hora de falar de pros e contras do noso mundo globalizado e mostráronse especialmente sensibilizados con problemas como a contaminación, a necesidade de enerxías alternativas ao petróleo e a situación laboral dos que confeccionan as nosas roupas baratas (e non tan baratas).

17/02/16

Mío, mi pequeño Mío

O luns 1 de febreiro, a 4ª hora, na "Hora de Ler", fixemos a sesión do club de lectura de 1ºESO na que conversamos sobre o libro Mío, mi pequeño Mío de Astrid Lindgren.
A sesión foi moi entretida e moi dinámica pois tratamos de atopar no libro ecos e imaxes de contos tradiconais -Brancaneves, O frautista de Hamelin ou Aladino. Recoñecimos tamén similitudes con Harry Potter. Falamos de que a novela é un canto a natureza, que apreciaron nas metáforas da fonte contadora de contos á tardiña,  nas árbores que nos dan todo , no manto tecido de soños; e finalmente recoñecimos nas caras dos persoñaxes do mundo imaxinario creado por Mío, as de persoas que foran para el importantes na vida real.


13/01/16

Si tú quieres

O luns 14 de decembro tivemos unha segunda sesión do club de lectura. Participaron uns trinta alumnos e alumnas, cos que comentamos a novela Si tú quieres, de Sonia Mirón. Tivemos a grande sorte de contar coa presencia da autora que respondeu a todas as preguntas e comentarios do alumnado e nos explicou como construíra a trama e os personaxes.

A novela  gustou moito, especialmente porque se desenvolve nun instituto. Foi toda unha sorpresa descubrir que a autora estudara no noso centro o que espertou aínda máis a simpatía coa obra e deu pé a procuar na novela referencias ao instituto.

Por outra banda, debemos reseñar a magnífica impresión que levou Sonia Mirón polo entusiasmo amosado por tantas alumnas e alumnos que relataron como imaxinaran eles aos personaxes, ós escenarios e que persuadiron á autora de escribir a segunda parte da novela.

02/12/15

Matilda


O pasado luns 30 de novembro reunímonos na biblioteca cun grupo bastante numeroso de alumnos de 1º da ESO para falar da novela de Roal Dahl:  MATILDA.


Esta obra conta a vida da protagonista, Matilda, que dende moi pequeña decátase de que non ten nada en común con ningún membro da súa familia. Os seus pais non lle dedican ningunha atención e ela pasa as horas do día lendo libros. Un día descubre que ten poderes e decide utilizalos para axudar á única persoa que lle demostrou afecto: a súa profesora.




En xeral foi unha novela que todos os rapaces atoparon divertida malia que algúns deles destacaron que o final foi un pouco triste. Todos os nenos participaron achegando os seus diferentes puntos de vista e comentando as partes da obra que máis lle gustaran. Como se daba a casualidade de que moitos deles tamén viran a película baseada nesta obra, aproveitamos para comentar as similitudes e diferencias entre o libro e a película. 

20/11/15

Palabras de caramelo

 O luns, 10 de outubro, reunímonos por primeira vez cos novos membros do club de lectura de 1º de ESO. O libro escollido é un libro sinxelo que non chega ás cen páxinas, pero con moita historia que contar.
Palabras de caramelo, de Gonzalo Moure, fala dun neno saharaui xordomudo que, a través da conversa co seu camelo, chega a facer uns marabillosos poemas. Pero tamén fala da amizade, da morte e, desde logo, da situación dos refuxiados saharauis na  hamada, onde se ven obrigados a vivir. De todo iso e moito mais conversamos cos novos lectores e lectoras do club deste ano, aos que lles encantou o libro.
Un dos episodios conta como a mestra da escola do campo de refuxiados apréndella a ler e escribir ao protagonista, que así empeza a comunicar con palabras todo o que sente e todo o que fala con Caramelo. Como este tema deunos moito para reflexionar, puxemos uns fragmentos da película El milagro de Ana Sullivan, baseado nunha historia real,  que conta como no século XIX, a mestra Sulivan conseguiu aprender a falar, ler e escribir a unha  nena cega e xorda, e o cambio que supuxo para ela o dominio da linguaxe.
Como sempre, a hora non deu de si todo o que quixéramos. Iso si: todos demos boa conta do pastel e biscoito que trouxemos para acompañar a sesión.