SAÍDA FIN DE CURSO 

Para celebrar o final deste curso escolar ,o alumnado dos clubs de lectura e do club de manga, pasamos unha xornada moi agradable. Collimos o barco ata Cangas e logo fixemos a andaina ata Limens, onde almorzamos e poidemos desfrutar un rato do baño e do sol.

 

XORNADAS DOS CLUBS DE LECTURA

Neste mes de maio tiveron lugar no Pazo de Congresos de Santiago as Xornadas dos clubs de lectura. Asistiu a coordinadora dos clubs: Mer Pérez.

Houbo como sempre algunhas propostas moi interesantes, como foi a charla coa autora e Premio Nacional de Teatro2024: Paula Carballeira,   que tamén tivemos o pracer de recibir na nosa biblioteca o ano pasado.

A conversa arredor da dinamización de clubs de lectura tamén resultou moi instructiva.

 

SESIÓN CONXUNTA DOS CLUBS DE LECTURA

Para rematar as sesións dos clubs deste ano, xuntámonos os dous clubs de lectura do instituto para comentar xuntos dúas obras: Morder la manzana de Leticia Dolera e Todos teríamos que ser feministas de Chimamanda Ngozi

A sesión foi levada pola profesora de Historia:  Ana Álvarez acompañada do alumnado do Comando Igualdade.

 

A PEL DO MUNDO  de  BERTA DÁVILA

Este mes os participantes co club de lectura dos pequenos tamén leron poesía.

Con este poemario, a autora percorre diferentes países de Europa, Asia, África para coñecer outras culturas ou falar do sufrimento dos nenos.

O alumnado escolleu un poema para recitar e falar del.

Rematamos facendo un mapamundi dos diferentes poemas

 

CALIDOSCOPIO DE  CONCHI DA SILVA

Este mes os participantes do club de lectura dos maiores leron poesia.

Tivemos a sorte de contar coa autora,Conchi da Silva para esta sesión , levada pola profesora de Lingua e literatura galega: Beatriz Varandas.

Os alumnos leron algunhas das poesias, as que máis lle gustaron, a autora contou como xurdira a idea deste libro e recitou tamén algún poema. 

Para terminar tres alumnas de 1º de Bach artístico, teatralizaron un dos poemas.

 

22 SEGUNDOS DE EVA MEJUTO

 22 segundos de Eva Mejuto foi o libro escollido  no club de lectura deste mes para os pequenos. O alumnado de 1º e 2º ESO reuniuse o pasado mércores 26 de febreiro para compartir sensacións e opinións sobre a lectura coa profesora de francés María González.

En primeiro lugar decidimos entre tod@s percorer os momentos máis salientables desta obra qu econta a historia de Álex, un rapaz que ao longo des 22 capítulos (22 segundos) trata de describir os momentos da súa vida que o fixeron decatarse de que o nome de Anxela e o xénero que lle foi asignado ao nacer, nada tiñan que ver con el. Algúns destes símbolos son o vestido de comuñón que non quixo levar, cando cortou o pelo, o feito de quere xogar ao fútbol cos rapaces no recreo etc...

Ademais elaboramos unhas portadas alternativas para o libro, que nos gustou moito.

 

CONEXIONES DE ELISABETH STEWART

Este mes a sesión de lectura dos maiores foi levada por Ana López, profesora de inglés e ex-compañeira do noso centro.

Tres adolescentes femininas nos seus mundos (tan distintos) nos permiten reflexionar sobre os modos de vida tan diferentes que temos no mundo actual.

A novela gustou moito tanto ao alumnado como a min, a conductora. 

A través da perda do móbil dunha nena canadiense, entrelázanse as historias dunha adolescente chinesa, que traballa montando teléfonos e dunha nena africana,víctima das mafias que traballan para empresas extranxeiras que explotan o coltán e minerais fundamentais para a tecnoloxía.

Cada participante no club fixo a súa reflexión e foi un gusto escoitala e ver o grado de intelixencia e a empatía que mostraron sendo tan novos.

 Comentamos moitos temas, de como os algoritmos nos van metendo nunha burbulla e van dirixindo as nosas vidas sen que nos percatemos, do sexting que exerce algunha rapazada, da presión da publicidade para cambiar de aparellos ou  de como a IA usa moita enerxía e moita auga para refrixerar eses ordenadores tan potentes. Saíron tamén temas como a presión exercida sobre os traballadores chineses, que son tratados como escravos, a contaminación sen control, as enfermidades que causa, a soidade en medio da multitude existente en China.

Comentamos o problema de  África coas armas e cos nenos soldados que son destruídos animicamente e obrigados  a cometer atrocidades, destruíndo a vida da xente local por mor dos minerais necesitados maiormente pola sociedade occidental.

Falamos tamén do traballo das ONGs, de aprender a non deixarnos levar pola opinión da maioría,de adquirir un espírito crítico. 

Con todas estas reflexións, na miña opinión, hai esperanza de futuro.

Ana López