PRIMEIRA SESIÓN DO CLUB DE LECTURA

Este mes de novembro tiveron lugar na nosa biblioteca as primeiras sesións do club de lectura.

Por unha banda, o club dos pequenos leron A avoa Gángster de David Walliams. 

A sesión foi levada por Damián Suárez, profesor de Lingua e literatura galegas.

Na reunión falouse do contido da obra e analizáronse os aspectos máis orixinais ou que máis gustaron (entre outras cousas recordamos algunhas das extravagancias dos personaxes principais, falamos das ilustracións que acompañan o texto ou do estilo de narrar de David Walliams e do seu gusto por incluír listaxes variadas e cheas de humor). O argumento d’A avoa gánster serviunos de pretexto para achegarnos a algúns elementos da cultura británica: Torre de Londres e xoias da coroa, beefeaters, Isabel II, métodos de tortura antigos... Para terminar buscamos as similitudes entre este libro e as obras máis coñecidas de Roald Dahl, e comprobamos que efectivamente non son poucas.

Por outra banda os maiores leron Zapatillas rotas de Xabier Quiroga.

 A sesión foi levada por Mer Pérez, profesora de Francés.

O libro resultoulles un pouco díficil. Ten un léxico moi complexo e ás veces non entenderon moi ben a trama. Aínda así, a sesión foi moi entretida e interesante. Afondamos un pouco nos personaxes principais a partir de frases do libro que tiñan que relacionar co personaxe. 

Falamos tamén de temas como o abandono dos maiores, o poder dos medios de comunicación, a corrupción do poder e do maltrato ás mulleres.